عبرت زوجة الفنان بدر الشعيبي عن فخرها بما يقدمه من أعمال مسرحية، مشيدةً بالجهود الكبيرة التي يبذلها وسعيه الدائم لتقديم تجارب فنية مختلفة تترك أثرًا لدى الجمهور.

وقالت في رسالة دعم مؤثرة : “ما قدرت أنظر للعرض الأخير ولا حتى نهاية اليوم من عشان أقولك شكثر أنا فخورة فيك، فخورة بكل شي قاعد تسويه، بكل تعبك، بكل تفصيلة قاعد تحارب عشان تطلع كاملة مثل ما تتخيلها”.

وأضافت: “صار لك أكثر من 48 ساعة ما نمت عشان هالعمل ، غير الأيام اللي قبلها وأنت شايل همه، ودايم أقولها لك وراح أعيدها ألف مرة، أنت مو بس كلام، أنت قول وفعل”

وأكدت:” أنت قاعد تغير مفهوم المسرح عند الناس، قاعد تخلي الناس تدخل وهي متوقعة شي وتطلع وهي مبهورة”، وتابعت : “قاعد تخلي الناس تشوف إن المسرح مو بس ضحك وتصفيق، المسرح إحساس ووعي وتأثير يعيش مع الشخص حتى بعد ما يطلع”.

وأشارت: “مهما تعبت ومهما ضغطت نفسك، ما ترضى تطلع بشي عادي، دايم تبي الأفضل، ودايم عندك إيمان بنفسك وبفريقك بطريقة تخلي اللي حولك يصدقون إن المستحيل ممكن”.

واختتمت رسالتها قائلة: “الله يوفقك يا رب، لأن فعلاً مالك منافس ، مو لأن الناس أقل منك، لا لأنك بكل مرة تنافس نفسك وتطلع بنسخة أقوى منك”.